泰式魚餅 / 拆骨雞翼 / 港式羅宋湯 (附食譜)

今晚晚餐好滿意.. 超好味道~~ ^0^

泰式魚餅  (參考May姐食譜) .. 好味道, 但我覺得可以再辣d

材料 : 大鯪魚起肉 250克 (我懶, 改買現成鯪魚肉) / 長豆角 3 條/ 椰奶 2湯匙 / 新鮮青檸葉 (切絲) 2片/ 粟粉 1 湯匙 / 蛋白 1.5 湯匙 / 糖 1 1/4茶匙 / 泰式紅咖喱醬 1 湯匙 (個人用了4-5匙, 哈哈) / 油 3 湯匙 (煎用)






辣魚醬 : 新鮮紅辣椒 (切碎) 1隻 / 蒜頭 1粒 (切碎) / 水1 湯匙 / 青檸汁 1 湯匙/ 魚露 1 湯匙 / 糖 2茶匙 / 切粒青瓜 1 湯匙  ..... (但我懶, 用泰式辣醬就算, 哈哈哈)

1. 先把鯪魚洗淨，抹乾。用匙逆魚骨方向刮肉出來。
2. 於大碗混合所有材料 (除了油)，順同一個方向用匙搞 2分鐘。
3. 將魚滑放入手掌，用力把魚滑撻入碗內，重覆20次，直至質地變軟綿。
4. 用微水濕手，取約2湯匙份量的魚滑，搓成小班戟形狀。
5. 以中火用油煎約 3分鐘至金黃色。混合辣魚醬材料享用。

拆骨雞翼  (參考簡易食譜.. 係好味既, 但拆骨好煩, 唔會再整...哈哈哈)

材料：雞翼 約16隻 / 薑 2片
餡料：冬菇 10 隻 / 甘荀 1 條 / 西芹 4 片
醃料：生抽1 1/2茶匙 / 老抽 1/2茶匙 / 糖 1/2茶匙 / 粟粉 1茶匙 / 紹酒 1茶匙 / 胡椒粉 少許 / 鹽 少許




1. 雞翼先洗淨,用鹽水浸10-15分鐘, 去除雪味.
2. 先將雞翼拆骨.用可剪骨較剪, 剪開雞翼頭尾骨(白色部份),然後將雞翼棟企用手指或刀仔慢慢將肉削離雞骨,雞翼中間兩條骨就會慢慢離肉而退出.
3. 雞翼拆骨後用醃料,醃20-25分鐘備用
4. 待雞翼入味後才釀入有關餡料.以免餡料漏出
5. (餡料)西芹洗淨去絲,切粗條 , 長度較雞翼為長便可。先拖一拖熱水備用
6. (餡料)甘荀,洗淨去皮切粗條,長度較雞翼為長便可。先拖一拖熱水備用
7. (餡料)冬菇用熱水浸至軟身,揸去水份,切粗條備用。
8. 待雞翼拆好骨及醃至入味就可以將 (5-7) 餡料釀入雞翼內.盡量填滿雞翼,三種餡料各一條釀入雞翼內.或自行調節分量 (但不可太過量,以免雞翼因太多餡而爆開)
9. 落2茶匙匙油, 燒熱油鑊 , 爆香薑片。轉慢火先煎雞翼至金黃色。待熟透後撈起
10. 準備隔油紙, 隔去多餘油份,便可以準備上碟






港式羅宋湯 (參考 Jacky 食譜..超好味~~~!!)

材料A : 牛骨 $10 / 紅蘿蔔 2條 / 西芹 1/4棵 /  蕃茄 4-5個 / 薯仔2個 / 洋蔥 1個 / 蒜頭 50 gm / 乾蔥 50gm / 茄膏 2罐 (每罐170gm) /  牛油 110gm / 香葉 2gm / 什香草 5gm / 百里香 2gm / 水 6 公斤  /  指天椒 1隻 ( 我自己加既 ^0^)




材料B : 牛展 1kg / 薯仔1個/ 紅菜頭1個/ 洋蔥1個/ 紅蘿蔔 2條/ 西芹 1/4棵




牛骨醃料 : 鹽1湯匙 / 胡椒粉半湯匙

1. 牛骨洗淨，瀝干，在牛骨上均勻灑上醃料。預熱焗爐約200度，放入牛骨焗約30分鐘至乾身及焦香，取出備用。
2. 材料 A 的紅蘿蔔 / 西芹 / 蕃茄 / 薯仔 / 洋蔥 洗淨，切條或切粒狀。鑊中下牛油燒熱，除了水之外，將所有材料炒香，隔去雜質，湯底備用。
3. 另備一湯煲，加入水和所有炒香的材料A, 大火煮滾後改小火煲約3小時。
4. 材料B 的牛展洗淨，切粒，飛水。薯仔 / 紅菜頭/ 洋蔥/ 紅蘿蔔/ 西芹 洗淨切粒。先將牛展粒放入湯底，用大火煲滾後改小火煲約1.5小時至腍身，再將其餘蔬菜下鍋，再煮半小時至腍身，下鹽調味即成。食用時，再灑上少許胡椒粉伴食。